السلام عليكم ورحمة الله.عيدكم مبارك سعيد. تعيدو وتعاودو ؤباش ما تمنيتو ان شاء الله.
ما كاين باس والو باس
كنا فالمعقول رجعنا فتهراس الراس
بنادم فهاد الوقت تلف
غير طالق رجليه ويشتف
منين ما داز ينتف
على هادا يضحك وعلى هاداك يهرف
المضاوة والهمزة ما زال فالسما تلقف
تبغي تنصحوا يبدا عليك يخرف
يسبك ويطرطرق فيك العين ويتفتف
وعلى شهادة الزور يظل يحلف
يشم فيك ريحت الدرهم يجي لعندك يزحف
يتبلحس وليك يحاول يقرب بالخف.
ماكاين باس والو باس
حل عينيك مزيان ؤ فرز بين الدهب والنحاس
بنادم فيه المشرار ؤ فيه مول الخير
تبت ما تزرب تعطي عقلك للغير
حسب خطاويك ورسم الطريق لاش تسير
رد بالك يبيعو ليك الضباب بتمن الحرير
يردوك زعطوط تشطح ؤ هوما ضاربين البندير
شحال من واحد بيعوه القصر وسكنوه فالقصدير
ما كاين باس والو باس
زير الحزام عنداك تفوت القياس
ما تكونش طماع ديما ملهوط
ارضى بقدر الله والمكتاب
شحال قدك تجمع وتبني فحيوط
وتقلب وجهك على الخوت والاحباب
ظنيتيها ليك دايمة يا المسخوط
اش تكون لقارون وفرعون فالنساب
قنع بحقك غمض عينيك قبل ما يتخبلو الخيوط
وتقول ها ندامتي ها ويلي فين مشا الحساب
حدر عينيك للتحت كول ؤ وكل وعاون المزلوط
ويلا تعاندتي مع اللي الفوق توضرتي فالسحاب
نهار تموت ما يتردم معاك غير الكفن والحنوط
والكنز اللي حوشتيه يتمتعو بيه الوراث القراب.
ماكاين باس والو باس
ماكاين باس والو باس.
عبدالرحيم المطيعي.
ليست هناك تعليقات:
إرسال تعليق