ريح العشق
خرج يتنزه ف
العمرة
عكلت رجليه
غمرة
داخ تسحابو
امراه
تلفت ف عينيه
النمرة
وسار يهمس
للگمرة
هبالي هبالك
ياالسمرة
عشقي كي
نار ف جمرة
عطري كي
وردة حمرة
حلاوتي كي
عسل التمرة
حروفي كلمة
متمرة
بالحكايم معمرة
وساط عليا
ريح العشق
ضربني ف ودني
بغى يعشقني
همس لعيني
همسه الرقيق
مرجان وعقيق
وانا مانفيق
حالماني حلامة
هايمة ف منامة
هوامة گالو هامة
حكيمة الحكامه
تموك لوامة
واللوحة بالسلامة
ل لالة شامة
وساط العجاج
والبحر عليا هاج
لعبت بيا لوماج
لساني عواج
كلامي فاج
وحرفي، الدجاج
نقبو ونقبني
من حبوب
الدرة حسبني
وهاد الغرام
ماعجبني
شد اوا غرامك
على ايامي
لايسحرها ويعود
حبي وغرامي
ف قلب مقامي
يحيي الجراح
اللي جرحها فاح
ناح وباح
ف الليل قباح
وتقندش ف الصباح
تقنديشة بتخربيشة
بغات تبني العشيشة
تصبر على التشيشة
ومالو حتى الحشيشة
ضربتها ب تفريشة
وگلست المشيشة
وبدات ف المشيميشة
تاكل كي قنديشة
وشدتني التبوريشة
قفزت من بلاصتي
حيت المراية قبالتي
نعتق بنت خالتي
طحيني ونخالتي
القفزة كانت قصيفة
والطيحة كانت خفيفة
ولاحت الحبيبة
داك القريطيفة
بالخلعة
م الحلق مگلعة
وم العين
طاحت دمعة
عنگت الخد
القاد بقدودو
والمحساد يلعن
جدودو
الفم وورودو
رحيق شهودو
يفكو المسجون
من قيودو
احمر بلعمان
والصدر كي الرمان
طلب جدودك يجودو
الخصر نحيل
والغصن يميل
يترطى عودو
ب تقل نهودو
والحب ف القلب
مايحيل
هرب عليه
كل جميل
الناجي منو قليل
يطرش وخ
يكون كي الفيل
بقلم ادريس جبيلو
المغرب
ليست هناك تعليقات:
إرسال تعليق