على الحبيب النبى صلوا
على الحبيب النبى صلوا
وسلموا يااهل الإيمان
هاتلاقوا أنواره يهلوا
ويتملى القلب اطمئنان
ألفين صلاه وسلام دايمين
يارب زى مابتريدها
من قبل آدم ليوم الدين
عدد ما ترضى بعددها
وزيدها ربِّ كمان ضعفين
من عبد عاشق بيه ولهان
وبلّغُه يارب وقول له
إن العباد ع الهادى صلوا
لنا رغبه ياكريم فى شفاعته
وشربه من نهر الكوثر
طاعتك يليها كمان طاعته
يسّر لنا مابيتعثّر
ياللى ف كلامك كان نعته
طه الحبيب المدثر
وصفت خُلُقه فى القرآن
وأملنا يوم رح نوصل له
ياعاشقين ع النبى صلوا
أصحابه كانوا عليه يخافوا
يفدوه جميعا بالأرواح
نبى وكامل أوصافه
وريقه بلسم أى جراح
للكعبه حجوا هناك طافوا
أذن بلال بصوت صدّاح
كان يومها فتح عظيم رحمان
وأبو بكر كان للنبى خِلُه
يامغرمين ع النبى صلوا
أحمد عبد الوهاب ( ابن بيرم )
رئيس نادي أدب القلج ...قليوبيه
فى ١٣\٧\٢٠١٧ الحادية عشره والربع م
ليست هناك تعليقات:
إرسال تعليق